Suna hai....!

Suna hai log usse aankh bhar ke dekhte hain,

So us ke shehar mai kuch din thehar ke dekhte hain,

Suna hai rabt hai usko kharab haalon se,

So apne aap ko barbaad kar ke dekhte hain, 

Suna hai dard ki gaahak hai chashm-e-naazuk uski,

So ham bhi us ki gali se guzar ke dekhte hain,

Suna hai us ko bhi hai shaar-o-shaa'iri se shigaaf,

So ham bhi mojize apne hunar ke dekhte hain,

Suna hai bole to baaton se phool jhadte hain,

Yeh baat hai to chalo baat kar ke dekhte hain,

Suna hai raat usse chaand takta rehta hai,

Sitaare baam-e-falak se utar ke dekhte hain,

Suna hai din ko usse titliyaa'n satati hain,

Suna hai raat ko jugnoo thehar ke dekhte hain,

Suna hai hashr hai us ki gazal si aankhen,

Suna hai us ko hiran dasht bhar ke dekhte hain,

Suna hai us ki siyaah chashmagi qayaamat hai,

So usko surmah farosh aah bhar ke dekhte hain,

Suna hai us ke labon se gulaab jalte hain,

So ham bahaar peh ilzaam dhar ke dekhte hain,

Suna hai aainah tamsaal hai jabee'n us ki,

Jo saadah dil hain usse ban sanwar ke dekhte hain,

Suna hai us ke badan ki taraaish aisi hai,

Ki phool apni kabaae'n qatar ke dekhte hain,

Bas IK nigaah mai lutta hai qaafilah dil ka,

So raah-e-rawaan-e-tammanna bhi ke dekhte hain,

Suna hai us ke shabistaa'n se muttasil hai bahisht,

Makee'n udhar ke bhi jalwe idhar ke dekhte hain,

Kise naseeb ki be-pairahan usse dekhe,

Kabhi kabhi dar-o-deewar ghar ke dekhte hain,

Ruke to ghardishe'n uska tawaaf karti hain,

Chale to us ko zamaane thehar ke dekhte hain,

Kahaniya'n hi sahi, sab mubalige hi sahi,

Agar woh khuwaab hai to tabeer kar ke dekhte hain,

Ab us ke shehar mai thehren ki kooch kar jaae'n,

ZIDDI aao sitaare safar ke dekhte hain....!